Kua whakarewaina e Te whai hua - kia ora a Te Ara Ahunga Ora tana kōwae tāke ki te reo Māori mā ngā kura reo Māori. Ka tuku āheinga ki ngā rangatahi ki te ako i te āhua o te mahi tāke, ahakoa ia he kaimahi, he kairakahinonga, he kaikirimana rānei ia a tōna wā.
He mea hoahoa te rauemi mā ngā Tau 9 me te 10 i te kura, ā, he mea whakawhanake i te taha o Te Tari Taake (IRD). He mea nui te ako he aha te tāke i te kura me te āhua o te whai wāhi o ngā tāngata o Aotearoa ki tō tātou hapori mā roto i te tāke i te wā e mahi ana tātou.
Ko te kī a Erin Thompson, Kaihautū i Te Ara Ahunga Ora: "Ko te tāke tētahi o ngā huarahi maha e whai wāhi atu ai tātou ki ō tātou whānau me ngā hapori, otirā ka utu i ngā mea pēnei i te mātauranga me te hauora."
"Ka whakaako hoki tēnei rauemi i ngā ākonga ki ngā momo huarahi maha o te mahi, ā, me te āhua o tō utu tāke. Ka whakarite i te tūāpapa pakari ki ngā ākonga mō te anamata," hei tāna.
Nā Mārina Kawe-Peautolu, Kaitakawaenga mā Te whai hua - kia ora i āwhina ki te whakawhanake i te kōwae, ā, hei tāna, "he pūkenga pai rawa ki te ako i te kura te whai manawanui ki te māramatanga o te moni, he aha tātou e tākehia ai, ā, me pēhea, otirā me te whakamahere mō koutou ko tō whānau."
Ko te kōrero a Cy Lochead, Kaiārahi ā-Motu mō te Tūtohu ā-Hapori a Te Tari Taake: "Ka tautoko mātou i ngā mahi ako a te rangatahi mā te whakaatu i te āhua o te mahi a te tāke i Aotearoa. Kei konei mātou ki te āwhina i ngā Iwi, ngā hapū, ngā whānau me ngā hapori kia tika ai ngā mahi i te tīmatanga. He mea nui ki te tohatoha i ngā mōhiotanga me ngā taputapu i te tīmatanga o te haerenga, kia purena ai te te kete mātauranga hei tautoko i ō rātou wawata".
"He tino hāngai tēnei huarahi ki tō mātou whāinga o te āwhina i a mātou kiritaki kia tika ngā mahi mai i te tīmatanga rā anō. He mea nui hoki ki te āwhina ki te hiki i te āheinga ahumoni me ngā whakataunga take a ngā ākonga i te tīmatanga rawa o tā rātou haerenga o te whai wāhi ki ō tātou hapori."
Ahakoa he kaimahi anamata ngā ākonga e utu tāke moni whiwhi ana, e whakahaere pakihi ana rānei, ka tuku ngā kōwae i ngā taipitopito ā-ringa me te tirohanga whānui hoki o te take e utu tāke ana tātou i Aotearoa.
I whakarewaina e Te Ara Ahunga Ora a Te whai hua - kia ora i te tau 2019, otirā e 78% ngā kura Māori e whakauru mai ana. He mea whakawhanake tēnei hōtaka mai i te tirohanga a te Māori, otirā i tīkina ngā whakaaro, ngā kōrero me ngā pou tarāwaho kaupapa Māori ki te hanga rauemi e arotahi ana ki te whakawhanake i te āheinga ahumoni e whai wāhi ana ki te oranga o ngā rangatahi me ngā whānau.
Koinei te hōtaka ako ahumoni tuatahi i tautokona e te kāwanatanga ki te reo Māori, otirā ko horopakitia mā ngā kura reo Māori. Ko ētahi atu rauemi ka kōrero i ngā take whānui mai i te nama me te whakahaere moni, ki te KiwiSaver me te inihua, otirā ka uru hoki ngā rauemi ako me ngā aromatawai mō ngā paerewa NCEA.